حکیم موسی زاده – 2025-09-27 15:17:43

العقيلة وبعد ليالٍ من فراق الحسين (ص)

آبات إيدي إعله خدي و الگلب مالوم

وعين الميته أهلها شلون تاخذ نوم !

—

آبات أيدي إعله خدي والگلب نصين

عين الميته أهلها ما تنام العين

مِدَچ لأهل الخناجر ضَل أخوي إحسين

والسلابه ما خَلَتْ عَليه إهدوم

—

السلابه هَدَّت فوگ جِسمه إتصول

مِثل إحسين مامش بالعرب مكتول

حَجَر وارماح وانبال وخِشَب وإنصول

ويذرِّي اتراب فوگه الأعزل إمن الگوم

—

شلون تنام عيني ومِنذبح مَنواي

طاح إعله الرمل دامي و يون بهداي

طعين وطبع بالمطعون يطلب ماي

فَتْ العطش چبده أمن العذب محروم

—

فَتْ العطش چبده وسِكنت الوَنه

شلون أشرب الماي بشربته اتهنه ؟!

ومات حسين ضامي وماشرب منه

صحت ياروحي ضلي اويه العطش للدوم

—

يريت الروح تطلع ما تضل ساعه

ولا يوصلني صوت إتكِسر اضلاعه

مات وما رضوني أشبع إمن اوداعه

بلاية اوداع عفته وخاف بيه يلوم

—

بلايه اوداع فارگته بلايه اوداع

رد بالرمح رأسه وجسمه ضل ع الگاع

للشراي هدمه اگبال عيني انباع

كون الروح ميته ومابقت لليوم